Cosadiella Enerxética [Ver coples del antroxu Regasificadora NON]

Coples de carnaval que podríen valer pa'l martes

Asturbulla



Qué cosa cosadiella ye una cosa
que nun ye cosadiella revesosa
que nos quieren meter con buen talante
igual da per detrás que per delantre.

Entamaron diseñando un espigón
pa enanchanos el puertu de Xixón,
y si el pueblu protestando nun los para,
faltó poco pa que acaben cola playa.

Pero nun dio nin tiempu a celebralo,
los que manden tiénenlo perclaro,
pues nun tienen concencia ni decencia
ganar perres ye la so única cencia.

Si nun pueden avanzar a la derecha
porque comen la sablera xixonesa,
retocando poca cosa nos proyectos
se zampen a Xivares tan contentos.

Y sin mirar si van venir más barcos,
nin facer bien les cuentes de los gastos,
imponen a traición un superpuertu,
y quieren que carguemos nós col muertu.

De piedra los camiones bien cargaos,
entamen a venir de tolos llaos,
rellenando la mar coles canteres
y tamién rellenando les carteres.

Si con Franco se fai La Llaboral,
pa gloria del fascismu nacional,
queda curtia col nuevu Muselón,
que nos monta el nuestru faraón.

Y si acasu pensáis que pue bastar
col estrozu de les playes y la Mar
esperá-y que vos cuente lo que piensen
ponenos nesi muelle si los dexen.

Lo mas grave de too ye lo del gas,
esplosivu y peligrosu por demás
nun quiero nin pensar nun accidente,
los de Xove y La Calzada nin lo cuenten.

Nun la quieren catalanes nin murcianos,
nin gallegos, franceses ni italianos,
nin siquiera California fizo tratu
anque ellí controla Terminator.

Si nun salta d’atentáu o d’accidente
acabóse’l golorín guapu a nordeste,
nin a mar nin a prau recién segáu,
sólo a peu de fumiacu reventáu.

Y qué pueden facer con tantos gases,
si yá tienen abondo pa les cases,
llevaránlo a les centrales a quemálo
y esi fumu habrá que respiralo.

Yá tenemos centrales en Narcea,
en Lada, n’Aboño y na Ribera,
pero quieren seguir faciendo más
en Nubleo y La Perea… y a tragar.

Nun importen nin el aire nin el clima,
les cuotes d’emisiones dan-yos risa,
si hai un euro pel mediu pa ganar
a la mierda’l Paraísu Natural

Y vengan torretes de tensión
pa esportar esa enerxía a casa dios
arrasando con bosques y montañes
y al que-y pase cerca casa que s’aguante.

¡Abasta! Dixo un mozu,
la montera tirando d’alborozu,
coles pistes qu’equí fueran saliendo,
el P.E.N.E.(*) ye lo que nos tan metiendo.


(*) Plan Enerxéticu Nacional d’España

Top