Ún de los mitos más espardíos nos últimos años ye´l mitu de “les tres Cultures”. La Península Ibérica, dicen dalgunos, o inda “España”, afiten otros, foi na Edá Media una especie de “remanso de paz” pesie a tantes y tantes guerres de “Reconquista” que deprendiéramos de neños estudiando hestoria.

Ye evidente qu´esi mitu espoxigó a partir de la llegada de Rodríguez Zapatero a La Moncloa, y nun ye una llocura pensar que de les oficines palaciegues salieron determinos, perres y otros sofitos cola fin de que trescalara na conciencia popular de la xente d´esti Estáu nomáu “España”, Estáu de duldosa identidá xunitaria.

Cuando menos, el mitu zapaterista trescaló ente abondos simpatizantes de la “esquierda” oficial y bienpensante, esa que s´entrega a la causa mundial liderada pol presidente del Gobiernu español, la causa del supuestu “Diálogu de Civilizaciones”. Un “diálogu” con clérigos islamistes qu´exercen dictadures teocrátiques nes que yá se sabe que les muyeres son esclaves, la tortura ye llegal y la llibertá de cultu y de pensamientu ta persiguida. De dialogar con estos teócrates nun pue salir naide bien paráu. Nun se dialoga con ellos: llúchase, y depués, gánase o piérdese la guerra. Pero nun hai Diálogu. Y sinón, dexái al Tiempu correr pa comprobalo.

La España medieval idílica ye un cuentu chinu bien espardíu nos llibros de testu y nes guíes turístiques de ciudaes hispanes onde sí hebo presencia xudaica y musulmana, amás de cristiana. Quieren tresponer al pasáu una utopía multiculturalista que tampoco ye real anguaño. Nel pasáu la xente d´estremada relixón “tolerábase” nel sen de que, dacuando, en dómines pacetibles, nun se mataba a cuchellaes. Pero la puerta de la morería, de la xudería y del barriu cristián taben, respeutivamente, bien pesllaes al cayer la nueche. Tolerancia vien de “tollere”, ñegar, vien de ñegar que l´otru étnicu y relixosu sía igual que yo.

Lo cierto ye qu´esi mitu de les Tres Cultures, o les Tres Relixones, ñega un fechu evidente. Y ye qu´en garrando puxu la parte cristiana de la península, sobre manera´l Reinu Ástur, los musulmanes foron reculando en territoriu ya inda en materia cultural. Foron p´atrás y, polo que cinca a la rexón al norte de ríu Dueru (frontera natural del nuestru Reinu) la so presencia arqueolóxica y etnocultural ye cuasi nula. Pero ye qu´al sur d´esa llinde hebo amás una repoblación de conquistadores norteños que se sobrepunxo al elementu bereber y árabe yá de por sí mínimu, por cuenta de que munchos islámicos yeren descendientes d´hispanoromanos convertíos. Lo islámico vencío na Reconquista fue lo superestructural: al so relixón y la so cultura.

Qu´anden con cuidáu los andaluces y la islamofilia de dalgunos, tenida güei por progresista. Ta nos planes radicales del islamismu espansivu quedase con esi cachu d´Europa y una cosa ye contactar culturalmente con cultures vecines y otra ye facer mecigaya d´una cultura que, depués de llargu lletargu ya inferioridá énte´l cristianismu y la europeidá, puxa con brenga anguaño y llánzase al proselitismu por cuenta de qu´esa europeidá ta cansada y derrotada y yá fincó les rodíes pues nun tien ganes de lluchar.

Los del norte nun tenemos munchos conflictos pola tema de les construcciones de mezquites o por violencies integristes d´islamistes. La crisis económica nun fai de sitios como Asturies un polo d´atraición d´emigración estranxera y esi multiculturalismu falsu, afaláu tantu por políticos socialistes y “progresistes” como por empresarios negreros que quieren mano d´obra barato nun esiste. Pero sí esiste n´Asturies un decrecimientu demográficu descomanáu de la xente nativo. Asturies ye gran espaciu baleru onde nun ñacen rapazos. Nun panorama asina, nun va ser d´estrañar qu´Asturies quede como ermu demográficu énte una bayura poblacional meridional que va buscase, como ye lóxico, el pan y la tierra saliendo d´ellí d´au nun la tienen. Entós el “Paraísu Natural” atoparánlo nun País que yá nun tien mocedá, sólo vieyos y parásitos. Los territorios, nun mundu onde nun solo hai clases sociales sinón pueblos que s´espanden o se contráin, queden ermos o queden llenos por nuevos ocupantes a falta de nativos con brenga abondo como pa siguir diciendo –cola cultura o coles armes- “esta tierra ye nuestra”.

Ye asina. La historia fáise d´esta miente.

Yá Europa ensembre, y tamién la Península, ta esperimentando un procesu de “meridionalización”. Esti cachu tierra asturiana yá lleva décades recibiendo les Corríes de Toros, el Flamencu, la Copla y milenta rasgos culturales que, pola propia debilidá de los sos habitantes (en gran parte), van siendo aceptaos como propios non siéndolo realmente pa nada. Esti difusionismu de rasgos foriatos ye talmente un velenu que mata l´árbol d´una cultura nacional, condergándola a una muerte o servidume dafechu y pa siempres. Pero nun se vayan amigos, que tovía hai más. Esti Norte nuestru meridionalízase colo español y colo flamenco, pero ¿y cuándo´l propiu Sur europeo se meridionalice más entá?

Hai quien s´esmolez pola perda de la llingua, pola perda de territorios del vieyu País Ástur, y yo ente ellos. Pero lo que tamos perdiendo ye, daveres, la batalla demográfica y l´autarquía económica que mos permitiría volver a llenar Asturies con asturianos.